Durante e Festival di Siudadania, dosentenan, hóbennan, mayornan, stipuladónan di maneho i organisashonnan sosial lo bini huntu pa kompartí konosementu, haña inspirashon, i traha huntu riba enseñansa inklusivo. E festival no ta un punto final, sino komienso di un movementu kaminda konekshon i kolaborashon ta sentral. Asina ta surgi un ret duradero rondó di siudadania, profundamente ankrá den e komunidat boneriano.
“Nos isla ta un tesoro balioso pa e generashonnan (yòn) aktual i futuro. Nan ta meresé un futuro prometedor, i e konfiansa ku nan por tin un influensia signifikante riba dje”
– Nilva Wout, direktor di SBMO, fuente di inspirashon na nòmber di enseñansa.
E seis pilánan di siudadania na Boneiru
Lo aserká siudadania na Boneiru a base di seis pilá di kontenido ku ta duna direkshon na enseñansa riba e isla i ta duna forma na kon muchanan i hóbennan ta krese bira siudadanonan embolbí.
Idioma tin un papel sentral komo medio pa ekspreshon, konekshon i formashon di identidat. Religion i identidat ta ofresé un base pa nifikashon i pa konsientisashon propio, esensial pa komprondé bo mes i otronan. Historia di Boneiru ta mirá komo un fuente balioso di komprondementu i rekonosementu, ku ta aportá na e konsenshi kolektivo. Naturalesa no solamente ta konsiderá komo nos ambiente di biba, pero tambe komo un responsabilidat kompartí den lus di kambio di klima i konsientisashon ekológiko. Demokrasia ta fungi komo un lugá di train pa partisipashon, diálogo i toma di desishon konhunto, kaminda hóbennan ta siña laga nan bos resoná.
Arte i kultura ta ofresé espasio pa kreatividat i ta fortalesé e sintimentu di komunidat i di konekshon mutuo.
E programa di e Festival di Siudadania
Boneiru konosé un konteksto kultural, históriko i di multilingwismo riku, pero tambe ta enfrentá retonan grandi riba tereno di enseñansa, partisipashon di hóben i koherensia sosial. E festival a originá for di preguntanan i nesesidatnan lokal: kon nos ta hasi enseñansa mas inklusivo, mas relevante, i mihó konektá ku e komunidat? Durante e evento, skolnan, organisashonnan i habitantenan ta bin huntu pa siña, pa kompartí, i pa konstruí un futuro kaminda hóbennan ta sinti ku ta mira i tende nan, i ta sinti nan mes embolbí.
E Festival di Siudadania ta pa tur hende ku ke kontribuí na un enseñansa fuerte i orientá riba futuro na Boneiru. Sea ku bo ta duna lès, guia hóbennan, òf ta embolbí a base di formashon di maneho, trabou den bario, kultura, òf organisashonnan sosial: durante e festival lo bo topa ku otronan ku ta kere ku kolaborashon i konekshon ta forma e base pa bon enseñansa.
E festival ta ofresé un programa variá na diferente lokalidat riba e isla, ku entre otro workshop, seshon di diálogo, i ehèmpel for di práktika inspirante. E seis pilánan di kontenido – idioma, religion & identidat, historia, naturalesa, demokrasia i arte & kultura – ta forma e prinsipio ku ta guia henter e programa.
E programa na Papiamentu lo sigui pronto.
Nos lo topa bo na e Festival di Siudadania?
Bo ta un dosente, un hóben, un hende grandi, òf djis un hende kurioso? Bini e Festival di Siudadania! Topa ku otronan, kompartí bo ideanan i laga e seshonnan ku ta kuadra ku bo eksperensia i bo interesnan inspirá bo. Nos ta primintí bo un eksperensia úniko – i tambe unu ku ta trese hende huntu, inspirá, i reta nan.
